- يخويه صح أني أحب الكتب واتونّس بشوفتهن بس متگلّي شكو عندي باقي بيهه !! أكيد الكتب اللي بيهه كلهه صينية.
- شنو السالفة ؟! بس لا متعرف تقره صيني؟
- لا والله شمعرفني.. لك "ملعون تقره هندي"؟! ... اقصد تقره صيني؟
- لا يخوي أني هم حالي حالك بس هيچي ردت أشاقيك .. صح لغتهم بدت تصير مهمة وصارت أكثر لغة بيهه عدد متحدثين بالعالم.. بس احنه جماعة لغة الضاد صعبة علينا الصينية ... يريدلها عمر بحاله.
- شوف وين ودّيتنا !! فهمني شنو قصة هاي المكتبة بروح جدّك وليش اللي يدخل الهه بعد ميطلع.
- يمعوّد سويتهه الأمن العامة مال صدّام مو مكتبة .. شنو اللي يدخل الهه بعد ميطلع ؟!
- هسه غير يحچي ... مو فتّه لگلبي فتّ.
- عمي السالفة من الأخير: هاي المكتبة مسوين بيهه فد تصميم فيكة بحيث من تدخل الها يتيه عليك السگف من الگاع.
- شلون بلّه واحد يتيه السگف؟ بس لا اللي يدخلها ينگلب أبو بريص!!
- راح أسوّي روحي ما سمعت سالفة الأبو بريص وأشرحلك شلون الواحد يتيّه السگف.
- أنت طيب وآني أستاهل ..
- أول شي شوف هاي الصورة ......
- سالمين !!! شنو بالضبط هذا المكان ووين السگف وين الگاع ؟
- شگلنه قبل شويه ؟
- هااااااااااااااااااااا !! تره كلش فيكة .. تحسهه مشهد من هذا الفيلم التحفة مال دي كابريو اللي اسمه "الاستهلال | Inception".
- اي بالضبط ... الفيكة هنا هيه أنه مسوين الرفوف مقوّسة شويه .. والأرضية مسويهه فد شي مثل المرايات السود. ومعتمدين على المساحة الچبيرة للمكان بحيث يصير عندك فد خداع بصر من تدخل للمكتبة وتحس روحك بنفق دائري.
- عجْبَتني والله !!
- الله يسلمك ... اخاف مو كلش عجبتك ؟
- لالا صدگ حلوة فكرتها ... بس هذا الشگ اللي بالسگف على شكل صاعقة مدري شلونه مو كلش حبيته.
- ما اريد اعيش الدور عليك وأگلك "انت ما عندك ذوق" و"شمفهمك بالفن" ... وهاي سوالف المثقفين اللي عبالهم بس همه بالدنيا.
- أشكرك يا طيب .. ولو انت گلتهن بعد.
- لالا جدّيات أحچي .. اني هم ما عرفت شنو الفكرة منه .. بس حسب ما قريت أنه هذا الشگ اللي بالسگف (على گولتك) اكو هدفين من عنده.
- اللي هنه ؟!
- الأول أنه الناس يندلّون طريقهم بالمكتبة حتى يوصلون لغرفة المطالعة الرئيسية ... وهاي هم راح اسولفلك عنها الغرفة. والثاني أنه يذكرون الناس بالنهر اللي موجود بالمدينة ويمر عالمكتبة .. شوف هاي الصاعقة بالسگف شلون طالعة چنها نهر بالانعكاس عالأرضية:
- وليش الشط بالذات يعني ؟ّ!
- خوش سؤال .. ولو خرّبتهه من سويته "شط" بمكان "النهر".
- اي چا غير هاي سوالف "چاي وصدگ" ونسولف براحتنه.
- هم صدگ .. الفكرة من التركيز على الشط مالتهم ... انه يريدون يذكرون الناس بفائدة هذا الشط وشلون چانوا الشعراء والأدباء يوصلون لهاي المدينة عن طريقه. وبالمناسبة تره حتى هاي الرفوف مسوّيها مقوسة حتى يذكرون الناس بالجسور المقوسة اللي موجودة بالمدينة.
- أهمية الشط فهمناها .. تقليد الجسور شنو الفكرة منه؟
- هنا فكرة حبوا يوصّلوها المهندسين اللي صمموا المكتبة ... انه المكتبة هي الوسيلة اللي توّصل الناس ويه الكتب مثل ما الجسور توصل الناس من مكان لمكان. وأبوك الله يرحمه.
- زين هيچي ديكور يدوّخ شويه .. شلون الناس تگدر تقره بيه وتركز بالقراءة؟
- ذكرتني أحچيلك عن قاعة المطالعة بالمكتبة .. طبعاً مسوين ديكورها مختلف شويه وما أدري يعني اذا على حچايتك لأن هذا التصميم يدوّخ أو عدهم شي ثاني بس هيه فد شي هم رهيب. شوف هاي الصورة:
- يابه تره يريدلنا روحة لهاي المكتبة .. مو إلا نقره ولو بس نشوفها.
- يله باچر امشي ناخذ الجهال ونروح .. هاي وياها الصين شيريدلها !!
- اي هم صدگ هاي وياها !! والله يا ربّي .. بعدين الجهال شنسوي بيهم ماخذيهم ؟!
- ها مو نسيت أگلك ... غير عدهم قاعة مطالعة مخصصيها للأطفال تخبّل.
- حتى المجهلة هم حاسبيلهم حساب .. شلون صايرة هاي القاعة سولفلي.
- تعبت من السوالف .. شوف هاي الصورتين بينما نشربلنا استكان چاي.
معلومات للباحثين:
اسم المكتبة: Yangzhou Zhongshuge
العنوان: Zhen Yuan - China
الشركة المصممة: XL-Muse
المصطلحات:
أتونس | أتمتع
متگلي | قل لي بربك
السالفة | القصة أو الموضوع
ملعون تقره هندي | مقتبسة من المسلسل العراقي تحت موس الحلاق
هيچي | لها العديد من المعاني واحيانا تستعمل بدون معنى
أشاقيك | أمزح معك
وديتنا | ذهبت بنا
فتّه لگلبي فتّ | أتعبني كثيراً
فيكة | مختلف
أبو بريص | الوزغ (نوع من السحالي المنزلية)
الشط | النهر
الجهال أو المجهلة | الأطفال