- أول شي اسمعوا هاي السالفة: 20% من مؤسسين الشركات التقنية بالعالم همه أساسا مهاجرين. تريدون تعرفون هاي النسبة ليش تنحسب كلش قوية؟ لأن المهاجرين بالعالم أساساً نسبتهم 4% حسب تقرير "گلوبال ستارت أب إيكوسستم" اللي تسويه منظمة "ستارت أب جينوم".
- اسمعوا هاي بعد: 40% من مؤسسين الشركات التقنية المسجلة ضمن أغنى 500 شركة أمريكية همه أما مهاجرين أو من أصول مهاجرة حسب تقرير من "آي أن سي دوت".
- مو بس هيچي ... البنك الدولي يقدر أنه بسنة 2025 راح تزود الهجرة للدول المتقدمة بنسبة 3% عن وضعها هسه وهاي الزيادة راح تولّد 365 مليار دولار من الأرباح العالمية بذيچ الدول.
- وأكو بعد سالفة تتعلق بالعمر.. اكو بحث سووه بجامعة ستانفورد يگول انه 86% من الشركات اللي يملوكها اللاتينيين بأمريكا (تره المهاجرين مو بس عرب !!) واللي جاي تنمو بسرعة وصارت مليونية يملكوها شباب من مواليد الألفينات اللي أساسا هاجروا لأمريكا وهمه أطفال.
- وهيچي من باب المثال عالمهاجرين يعني عدكم ستيف جوبز مؤسس شركة "أبل" أهله مهاجرين سوريين .. وسيرجي برين اللي ساهم بتأسيس شركة "گوگل" هوه أصلا لاجئ روسي .. وحتى جراهام بيل مخترع التلفون ومؤسس شركة "أي تي أند تي" هم مهاجر اسكتلندي .. وإيلون موسك مؤسس شركات "تيسلا" و"سبيس أكس" وبعد مدري چم شركة غيرهن مهاجر كندي مولود بجنوب أفريقيا .. ومؤسسين شركة "باي بال" الثلاثة ثلاثتهم مهاجرين من المانيا (حتى ألمانيا عدهه مهاجرين !!) وبولندا واوكرانيا.
- بسبب هالتأثير القوي للمهاجرين عالسوگ .. أكو حالياً أكثر من 15 دولة (أمريكا جانت وياهم بزمن أوباما وهسه لا !!) مستعدين ينطون فيزا خاصة اسمهه "فيزت شركة ناشئة" وهاي الفيزا ينطوهه للي يشوفون عنده الموارد والنية أنه يفتح عمل جديد.
- أكو دراسة أكاديمية عنوانها "أهم خمس صفات شخصية ترتبط بنية الهجرة عند الطلاب الليتوانيين" منشورة على موقع "ريسيرچ گيت" تبين أنه أغلب الصفات الشخصية للمهاجرين هيه نفسهه صفات رواد الأعمال الناجحين. وبنفس هالموضوع نشرت مجلة فوربس المختصة بالتجارة والأعمال تقرير جان عنوانه "ليش المهاجرين همه بطبيعتهم رواد أعمال؟ ".
"المهاجرين عدهم ميول حتى يفتحون شركات جديدة بنسبة الضعف عن الناس العاديين".
- تقرير فوربس يكول أنه الصفات اللي تساعد المهاجرين حتى يتكيفون بأوطانهم الجديدة هيه هيه نفسهه الصفات الي يحتاجوها رواد الأعمال حتى تنجح شركاتهم الجديدة واللي هيه:
- روح ثورية دائما تريد تغير فد شي بواقعها.
- عزم ورغبة حقيقية بتنفيذ الأفكار.
- نظرة شويه مختلفة بخصوص الأشياء اللي يحتاجهه السوگ.