top of page

التجربة المانچستراوية: شلون تحصل فلوس بدون ألقاب!


 

بوغبا ولوكاكو يحتفلون بالهدف الثاني على چيلسي ببطولة الكأس على ملعب ستامفورد بريدج - الصورة من التقرير الأصلي

- هذا السؤال مدوخ هواي متابعين لكرة القدم .. وهذا الشي خله صحيفة فاينانشيال تايمز تسوي تقرير صحفي مرتب عن الاسلوب الي يكدر بيه نادي رياضي (ركزولي على رياضي!!) يحصل فلوس بدون ميحصل ألقاب. النقاط الجاية بيهه سالفة عالماشي عن هذا التقرير.


- يگول التقرير انه من يوم استقال اليكس فيرغسون بـ 2013 لليوم ... الشياطين الحمر ما ماخذين لا دوري ولا أبطال (اللهم لا شماته !!) بس الغريب انه ايرادتهم بـ 2013 جانت بحدود 480 مليون دولار وبـ 2018 وصلت 780 مليون دولار (اللهم لا حسد !!) واجوا بالمركز الثالث بالايرادات وره ريال مدريد وبرشلونة اللي بآخر كم سنة "مليانين ألقاب مليانين".


السير اليكس فيرغسون ويه اخر لقب دوري اخذه قبل ليتقاعد ... أيام الخيرالمانشستراوية

- تصريحات مسؤولين النادي بهالموضوع متناقضة شوية حسب ميگول التقرير .. المدير المالي للنادي كليف باتي يگول "احنه دائما نحتاج الفوز .. مو بس حتى تمشي أمورنا وتربح تجارتنا .. وانما هذا يعني هوه السبب الرئيسي لوجودنا" (أنا أفوز .. إذن أنا موجود - ديكارت المانچستراوي !!). وبنفس الوكت نائب المدير التنفيذي للنادي واللي اسمه إد وودورد يگول "مستوى اللعب ما إله ذاك التأثير على الأشياء التجارية الي نگدر نسويهه". وحسب التقرير فانه مسؤولين النادي من يسوون ميزانيتهم المالية يحسبون عائداتهم من الجانب الرياضي على اساس انه يوصلون لربع نهائي الأبطال ويحققون المركز الثالث بالدوري وهاي هيه.



وودوارد وباتي كليف قبل واحد من الديربيات .. مدري ليش كليف ضام وجهه عن الكاميرا

- الحقيقة الي يوصلها التقرير انه التصريحين بيهن شوية منطقية .. صحيح الأعمال التجارية اللي يديرها الفريق واللي راح نحچي عنها فد شويه بالتفصيل جاي تنجح وخوش تحقق أرقام .. بس قبل فترة مصرف دويچه بانك نشر تقرير يگول انه "صحيح علامة مانچستر يونايتد التجارية قوية بس هذا الفشل بتحقيق الألقاب ممكن يقلل أثر هاي العلامة على الجيل الجديد من المشجعين وهالشي راح يقلل قوة الصفقات التجارية بالمستقبل".


- وحدة من الشغلات الحلوة الي يحللها التقرير .. انه بالسنوات الستة الأخيرة من زمن فيرغسون، مانچستر يونايتد جان بالمركز الثالث بترتيب "الفرق الي تنطي اكثر رواتب" (الفرق الطاگة !!) وگدروا ياخذون 3 بطولات دوري ويصعدون 3 نهائيات ابطال فازوا بوحدة منهن بس (شنگول على برشلونة !!) ... بينما بالسنوات الخمسة الأخيرة، صاروا بالمركز الأول من ناحية الرواتب وصافي الصرف مالتهم عالتعاقدات (يعني فلوس المشتريهم مطروح منها فلوس الباعوهم) وصل 650 مليون دولار تقريباً .. بس ما گدروا يحصلون الدوري ولا مرة ويادوب وصلوا ربع نهائي الأبطال مرة وحدة بس.


مارسيال ودي ماريا ولوكاكو وبوغبا .. عينة من التعاقدات الأخيرة للشياطين

- واذا نجي على تفاصيل الاعمال التجارية للشياطين ... راح نشوف انه 33% من عائداتهم يحصلوهه من البث التلفزيوني للعبات الفريق واللي يرتبط بصفقات بالمليارات سوتها رابطة الدوري الانجليزي ويه شركات خارجية ... و18% يحصلوهه من بيع تذاكر اللعبات اللي تصير بملعبهم الأولد ترافود واللي يتحمل 75 الف متفرج ... والباقي واللي هوه الأقوى يجي من عقود الرعاية مثل عقدهم ويه شركة أديداس اللي قيمته حوالي 990 مليون دولار من 2015-2025 أو عقدهم ويه شركة شيفروليت للسيارات اللي مخلين شعارهم على الدريس مال اللاعبين واللي قيمته حوالي 560 مليون دولار من 2015-2022 غير العقود الصغيرة بنيجيريا واليابان وامريكا وغيرها. يمكن هالشي هوه اللي مخلي ادارة مانچستر تعين اكثر من 100 موظف بقسم الرعاية واللي ماكو نادي ثاني عنده هلگد موظفين بهالقسم.


قميص الفريق وعلامة تشيفروليت

- اخير شي يوصل التقرير الى انه اذا يريد الفريق يرجع لمكانه الطبيعي بالبطولات لازم يسوي شغلتين: الأولى أنه يلگه وريث حقيقي للسير اليكس فيرغسون اللي طگگ الفريق مالياً ورياضياً وهذا الوريث ممكن يكون هوه سولشاير المدرب الحالي نفسه .. والثانية أنه يعين مدير رياضي جديد Head of Soccer اللي وظيفته انه يحضّر لاعبين ممكن يطوّلون سنوات بالفريق مثل ما باقي الفرق القوية عدها مثل ليفربول وتوتنهام والسيتي، وهذا المنصب طبعا لغاه مورينيو من درب الفريق لان چان يريد هوه يتحكم بيه حسب ميگول التقرير.


bottom of page