top of page

شلون تحلل لعبات كرة القدم وتفهم تفكير المدرّبين - ح1




- اول شي .. اذا انت تشجع واحد من الفريقين اللي جاي يلعبون فلتحاول أبد أنه تحلل اللعبة بالمباشر لأن راح تضيع ونسة اللعبة وراح يكون تحليلك خطأ ... وكت المباشر حضّر كرزاتك وچاياتك وجگايرك واگعد شوف اللعبة ويه اهلك أو أصدقاءك وتونس بيهه كمشجع وبس (ولو هالشي صعب بالنسبة للي يحبون التحليل بس حاول!!). التحليل لازم تخليه لما تشوف اللعبة بالإعادة .. وهنا احسب حسابك كون تسجل اللعبة حتى تشوفهه مرة ثانية براحتك.


- ما دامك ببداية التحليل وتريد تبدي صح ... حاول من تتابع اللعبة بالمرة الثانية أنه كل 10 ثواني تسوي "إيقاف" وتشوف تمركز اللاعبين وتفكر بداخلك شنو السبب اللي خله اللاعب ياخذ القرار مالته: ليش هذا اللاعب وگف هنا؟ ليش اللي عنده الطوبة ما لعب باص لذاك اللاعب؟ ليش فلان لاعب راح كلش يم خط الرمية؟ هاذي التقنية راح تساعدك تفهم بهدوء شلون اللاعبين ياخذون قراراتهم بالملعب .. لتنسه اللاعبين بحكم شغلتهم محترفين باتخاذ القرار بجزء من الثانية وبالنسبة الك كمحلل مبتدئ تحتاج تشوف الموضوع بشكل ابطأ.


- وما دام سولفنا على اتخاذ القرارات .. تره لحظات الابداع بكرة القدم كلهه تجي من اتخاذ القرار الصحيح بالوقت الصحيح والفريق اللي لاعبيه يسوون قرارات خطأ أكثر هوه اللي يخسر... ولذلك تشوفون الفرق اللي على گد حالها تحب تلعب عالكرات الطويلة لأنه عدد القرارات يكول أقل... وسبب الأخطاء اللي تصير بالدقائق الأخيرة دائما هوه الإرهاق اللي يخلي اللاعبين يفقدون تركيزهم وياخذون القرارات الغلط.. المدربين الناجحين همه اللي يدربون لاعبيهم على سرعة اتخاذ القرار وواحد من أهم المدربين اللي چان يركز على هالموضوع هوه السير اليكس فيرگسون مدرب اليونايتد. فيرگسون ما چانوا عنده أفضل اللاعبين بالعالم من ناحية المهارات بس چان يدربهم على موضوع السرعة بالقرار وأهم من السرعة موضوع صحة هذا القرار... حاولوا تتذكرون لعب كاريك وگيگز وسكولز وفليچر وبارك جي سونگ وبيكهام وفيرون (وحتى سولشاير اللي جاي يحاول هسه يطبق نفس الأسلوب !!).




- نرجع للطريقة اللي لازم تتابع بيها اللعبة حتى تكون محلل.. اكو شغلتين لازم نتفق عليهن: أول شي من تريد تحلل لعبة لازم تقسمها على 3 أقسام: هجومية ودفاعية وانتقالية. هذني الأقسام الثلاثة راح نعتبرهن عناوين رئيسية وهواي راح تطلع منهن عناوين فرعية نسولف عنها بالحلقات الجاية. والشغلة الثانية: ماكو شي اسمه فريق يلعب بخطة ثابتة مثل 4-3-3 و4-4-2 مثل ميطلعون ببداية اللعبة. كل فريق عنده بالقليل خطتين: هجومية ودفاعية وأكو فرق لعبهه معقد (مثل برشلونة غوارديولا وبايرن هينكس!!) عدهم كذا خطة اثناء الدفاع وكذا خطة أثناء الهجوم. مرات يعني تسمع فريق يلعب 3-5-2 .... معقولة يعني هذا الفريق بس 3 يدافعون بيه من أصل 10 لاعبين بالساحة؟



- أول شي لازم تسويه بالتحليل أنه تعرف شكل الخطة الدفاعية والهجومية لفريقك وللفريق الثاني باللعبة... يعني لما تكون الطوبة عد فريقك وتشوفهم جاي يبنون هجمة، وگّف اللعبة وشوف توزيع لاعبين فريقك شنو حتى تعرف خطتهم الهجومية وبنفس الوكت شوف خطة الخصم الدفاعية. بعدين انتظر اللحظة اللي بيهه فريق الخصم يبني هجمته وشوف خطة فريقك الدفاعية وخطة الخصم الهجومية. والشي المهم هنا أنه تنتبه منو اللاعبين اللي جاي تتغير أماكنهم بين الخطة الهجومية والخطة الدفاعية مثل الأظهرة (التكوك!!) ولاعب الوسط الدفاعي وغيرهم. هذوله اللاعبين كلش راح يفيدوك حتى تميّز المرحلة الانتقالية.


- من الأشياء اللي لازم تتعلم تلگاها بشكل سريع هوه موضوع "الزيادة العددية" .. اللي هيه أنه تلگه هواي لاعبين من نفس الفريق متواجدين بمنطقة لعب وحدة بحيث يكونون (أو يحاولون يكونون) أكثر من لاعبين الخصم بنفس المنطقة.. يعني مثلا تلگه "كوتينيو وألبا وأرتور" كلهم متواجدين بالجهة الهجومية اليسرى من الملعب أثناء الهجوم. وهنا حتى تفهم اللعبة صح لازم تعرف منو اللاعبين الي دورهم أنه يسوون الزيادة العددية وكل لاعب مسؤول عن يا منطقة. بالبداية ممكن راح تعيد اللقطات اكثر من مرة وبالذات اذا جنت تتابع لعبة لفرق مو كلش معروفة ومتگدر تميز أسماء لاعبيها.


- شغلة أخيرة لازم تخليها ببالك لمن تحلل خطة أي فريق .. لازم تحسب كم لاعب من الفريق جاي يتواجد بكل مرحلة أثناء اللعب. وتحاول تميز اللاعبين اللي أدوارهم تكون شويه مختلفة أثناء الهجمة ... مثلا: اللقطة المشهورة لكوفاسيچ بالكلاسيكو بين الريال وبرشلونة لما ترك راكيتيچ يتقدم بالطوبة ويصنع الهدف الأول لأن كان تركيزه على مهمته بمراقبة ميسي (ما گاعد نحچي عن قراره صح لو خطأ !!). على فكرة أكو فد معلومة وهيه مو جديدة بس لازم تخليها ببالك: عدا الگولچي وقلب الدفاع .. كل الفريق يشارك بالهجمة بالحالة الدفاعية والهجومية والانتقالية.



اللي حچيناه بسالفتنا مال اليوم .. راح يكون الأساس مال الحلقات الجاية واللي راح يصير بيها الحچي بالتفاصيل.



 

مترجم من سلسلة Football Tactics for Beginners المنشورة على موقع The False 9 والحلقة الأصلية تلگوها هنا.

bottom of page